میئر کراچی مرتضیٰ وہاب نے لیاری میں عوامی مسائل براہ راست سننے کیلئے دورہ کیا

میئر کراچی مرتضیٰ وہاب نے لیاری میں عوامی مسائل براہ راست سننے کیلئے دورہ کیا، اس موقع پر انہوں نے واٹر کارپوریشن کو نکاسی آب بہتر بنانے کیلئے فوری اقدامات کی ہدایت کی۔
تفصیلات کے مطابق میئر کراچی مرتضیٰ وہاب نے پینے کے پانی کی فراہمی ہر حال میں یقینی بنانے کے عزم کو دہرایا، اُن کا کہنا تھا کہ لیاری میں جدید مشینری نصب کی جائے گی، جس سے نکاسی آب کے مسائل ختم ہوجائیں گے۔
مرتضیٰ وہاب نے عوامی شکایات پر فوری ایکشن لیتے ہوئے جمیلہ پمپنگ اسٹیشن کامعائنہ کیا، واٹر کارپوریشن کوہنگامی بنیاد پر پمپنگ مسائل حل کی ہدایت کی۔
انہوں نے بلدیاتی نمائندوں کو بارش کے بعد سڑکوں کی فوری مرمت کا حکم جاری کیا، ساتھ ہی صفائی کے نظام کو مزید موثر بنانے پر خصوصی توجہ دی۔
مرتضیٰ وہاب نے عوامی سہولت کیلئے دن رات کام کرنے کا عزم دہراتے ہوئے کہا کہ شہریوں کو ریلیف دینا اولین ترجیح ہے، بارشوں سے نمٹنے کیلئے پلان موجود ہے۔
دوسری جانب سندھ کے سینئر وزیر شرجیل میمن کا کہنا ہے کہ 24 سے 48 گھنٹے میں بارش کا نیا اسپیل آنے کی پیشگوئی کی گئی ہے۔
شرجیل میمن نے اپنے حالیہ بیان میں کہا کہ بارشوں اور دریاؤں میں بڑھتے پانی کے پیش نظر بڑے پیمانے پر ریسکیو و ریلیف آپریشنز جاری ہیں، کراچی میں بارشوں کے بعد پیدا صورتحال بتدریج بہتری کی طرف جا رہی ہے، ڈیم بھرنے اور شدید بارشوں کی وجہ سے لیاری ندی اور ملیر ندی میں طغیانی آئی۔
کراچی میں بارش، کئی علاقے اور سڑکیں زیر آب، تعلیمی ادارے بند
انہوں نے کہا کہ سمندر میں اونچی لہروں کی وجہ سے بھی بارش کے پانی کے اخراج میں تاخیر ہوئی، کچھ نشیبی علاقوں میں شہریوں کو مشکلات کا سامنا کرنا پڑا، مزید بارشیں نہ ہوئیں تو صورتحال کچھ ہی گھنٹوں میں معمول پر آ جائے گی۔
ان کا کہنا تھا کہ کراچی کی شہری حکومت اور پی ڈی ایم اے سمیت تمام ادارے متحرک ہیں، تریموں اور پنجند پر درمیانے درجے کا سیلاب ہے، پنجند گڈو کے درمیان انتہائی اونچے درجے سیلاب ہے، گڈو اور سکھر بیراجز پر درمیانے درجے کا سیلاب ہے۔