لاہور میں فلسطینی طلبہ کے اعزاز میں گریجویشن تقریب کا انعقاد کیا گیا، جہاں 38 طلبہ نے بیچلر آف ڈینٹل سرجری کی تعلیم مکمل کرنے کے بعد ڈگریاں حاصل کیں۔ الخدمت فاؤنڈیشن اور یونیورسٹی آف لاہور کے اشتراک سے منعقدہ تقریب میں فارغ التحصیل طلبہ کو ڈگریوں کے ساتھ ڈینٹل کٹس بھی فراہم کی گئیں، جبکہ ایک سالہ کلینیکل ہاؤس جاب مکمل کرنے والے 13 فلسطینی ڈاکٹروں کو انٹرن شپ کی اسناد سے بھی نوازا گیا۔
تقریب سے خطاب کرتے ہوئے صدر الخدمت فاؤنڈیشن پاکستان ڈاکٹر حفیظ الرحمان نے کہا کہ فاؤنڈیشن نے فلسطینی طلبہ سے کیا گیا وعدہ پورا کیا ہے۔ انہوں نے حکومتِ پاکستان اور قاہرہ میں پاکستانی سفارت خانے کے تعاون کو سراہتے ہوئے کہا کہ انہی کی معاونت سے فلسطینی طلبہ کو پاکستان میں محفوظ اور سازگار تعلیمی ماحول میسر آیا۔
