اقوام متحدہ کی سلامتی کونسل نے سوات میں ہونے والے خودکش حملے کی شدید الفاظ میں مذمت کرتے ہوئے اسے بزدلانہ اور گھناؤنا دہشت گرد حملہ قرار دیا ہے۔
سلامتی کونسل کی جانب سے جاری اعلامیے میں حملے کے نتیجے میں قیمتی انسانی جانوں کے ضیاع پر گہرے دکھ اور افسوس کا اظہار کیا گیا۔ کونسل نے شہدا کے اہلِ خانہ سے دلی تعزیت کرتے ہوئے زخمیوں کی جلد اور مکمل صحت یابی کے لیے نیک تمناؤں کا اظہار بھی کیا۔
اعلامیے میں کہا گیا کہ دہشت گردی عالمی امن اور سلامتی کے لیے سنگین خطرہ ہے اور اسے کسی بھی مقصد یا جواز کے تحت قبول نہیں کیا جا سکتا۔
سلامتی کونسل نے حکومت اور عوامِ پاکستان کے ساتھ مکمل یکجہتی کا اظہار کرتے ہوئے تمام رکن ممالک پر زور دیا کہ وہ دہشت گردی کے خلاف کوششوں میں پاکستان سے بھرپور تعاون کریں۔
