راجستھان: بھارتی ریاست راجستھان میں دہلی ممبئی ایکسپریس وے پر رشی کیش سے اندور جانے والی ایک سلیپر بس ٹرک سے ٹکرا کر آگ کی لپیٹ میں آ گئی، جس کے نتیجے میں 8 افراد ہلاک اور 24 زخمی ہو گئے۔
بھارتی میڈیا کے مطابق حادثہ رات تقریباً ڈھائی بجے پیش آیا، جبکہ ابتدائی تحقیقات میں شبہ ظاہر کیا گیا ہے کہ تیز رفتاری اور ڈرائیور کو نیند آ جانے کے باعث حادثہ پیش آیا۔
حکام کے مطابق ہلاک ہونے والوں میں 5 افراد جھلسنے جبکہ 2 شدید زخمی ہونے کے باعث دم توڑ گئے، جبکہ زخمیوں میں خواتین اور بچے بھی شامل ہیں جنہیں ضلع دوسہ کے اسپتال منتقل کر دیا گیا ہے۔
مقامی افراد نے دعویٰ کیا کہ امدادی اور فائر بریگیڈ کی ٹیمیں تاخیر سے پہنچیں، جس سے جانی نقصان میں اضافہ ہوا، جبکہ میڈیا رپورٹس کے مطابق بس کے سامان رکھنے والے حصے میں سگریٹ کے پیکٹ موجود ہونے کا بھی دعویٰ کیا جا رہا ہے، تاہم اس کی سرکاری طور پر تصدیق نہیں ہوئی۔
