تہران: بین الاقوامی خبر رساں ادارے رائٹرز کی رپورٹ کے مطابق حالیہ امریکی اور اسرائیلی حملوں کے بعد ایران میں ایٹمی ہتھیاروں کے حصول کے مطالبات میں تیزی آ گئی ہے۔
رپورٹ میں کہا گیا ہے کہ ایران کے قدامت پسند اور سخت گیر سیاسی حلقے اب کھل کر جوہری ہتھیار بنانے کی حمایت کر رہے ہیں، جبکہ اسرائیل کے ساتھ جاری کشیدگی کے بعد ان عناصر کا اثر و رسوخ بھی بڑھ گیا ہے۔
تجزیہ کاروں کے مطابق یہ حلقے ایران کی موجودہ جوہری پالیسی میں فوری تبدیلی کے خواہاں ہیں، جس کے تحت ایران اب تک ایٹمی ہتھیار نہ بنانے کے موقف پر قائم رہا ہے۔
ایرانی رہنماؤں کا مؤقف ہے کہ امریکہ اور اسرائیل کی جانب سے بڑھتے ہوئے حملوں اور دباؤ کے پیش نظر ایٹمی صلاحیت کا حصول ناگزیر ہو چکا ہے، اور یہی واحد راستہ ہے جس کے ذریعے ممکنہ خطرات کو روکا جا سکتا ہے۔
عالمی مبصرین نے خبردار کیا ہے کہ اگر ایران اپنی جوہری پالیسی میں تبدیلی کرتا ہے تو اس کے اثرات نہ صرف مشرق وسطیٰ بلکہ عالمی سیاست پر بھی گہرے مرتب ہوں گے، اور یہ صورتحال ایک بڑے جیو پولیٹیکل بحران کو جنم دے سکتی ہے۔
