سعودی عرب سفر کرنے والے پاکستانی مسافروں کے لیے بڑی سہولت فراہم کردی گئی ہے۔ سفر سے قبل چار ویکسینز لگوانے کی لازمی شرط میں 25 ستمبر تک عارضی نرمی کردی گئی ہے، جس کا باقاعدہ نوٹیفکیشن بھی جاری کردیا گیا۔
انچارج ویکسینیشن سینٹر ڈاکٹر شازیہ آصف کے مطابق 25 ستمبر سے قبل عمرہ زائرین اور وزٹ ویزا پر سعودی عرب جانے والے افراد بغیر ویکسی نیشن کے بھی سفر کرسکیں گے۔
اس سے قبل چار ویکسینز کی لازمی شرط کا اطلاق 14 ستمبر سے ہونا تھا۔ ذرائع کے مطابق سعودی حکومت کی ہدایت پر پاکستان نے سعودی عرب جانے والے مسافروں کے لیے گردن توڑ بخار، انفلوئنزا، پولیو اور ییلو فیور کی ویکسین لازمی قرار دی تھی۔
حکام کے مطابق ویکسی نیشن کی شرط مکمل طور پر نافذ ہونے کے بعد کراچی سے حجاز مقدس جانے والے مسافروں کے لیے نادرا سے تصدیق شدہ ویکسی نیشن سرٹیفکیٹ ساتھ رکھنا ضروری ہوگا۔
ویکسی نیشن پروگرام میں عارضی نرمی سے بالخصوص عمرہ زائرین اور وزٹ ویزا پر سعودی عرب جانے والے مسافروں کو فوری ریلیف مل گیا ہے۔
