دریائے چناب میں شدید طغیانی کے باعث لیاقت پور کے علاقے بیٹ پرارہ میں بستی بڈا پرارہ کے قریب حفاظتی بند ٹوٹ گیا، جس کے بعد سیلابی پانی تیزی سے قریبی آبادیوں میں داخل ہوگیا۔
مقامی ذرائع کے مطابق پانی آبادیوں میں داخل ہونے سے زمینی رابطے منقطع ہوگئے ہیں اور متعدد افراد اپنے گھروں میں محصور ہو کر رہ گئے ہیں۔
حفاظتی بند ٹوٹنے کے نتیجے میں 50 ایکڑ سے زائد رقبے پر کھڑی کماد، مونگ، تل اور چارے کی فصلیں پانی میں ڈوب کر تباہ ہوگئیں، جبکہ درجنوں مکانات بھی زیرِ آب آگئے ہیں۔
علاقہ مکینوں کا کہنا ہے کہ پانی کے تیز بہاؤ کے باعث انہیں شدید مشکلات کا سامنا ہے اور فوری امدادی اقدامات کی ضرورت ہے۔
