اسلام آباد: آل پاکستان آئل ٹینکرز آنرز ایسوسی ایشن کے چیئرمین میر شمس شاہوانی نے کہا ہے کہ ملک کی موجودہ صورتحال کے باوجود پورے پاکستان میں آئل ٹینکرز کے ذریعے تیل کی سپلائی معمول کے مطابق جاری رہے گی اور اسے کسی صورت معطل نہیں کیا جائے گا۔
ویڈیو پیغام میں میر شمس شاہوانی کا کہنا تھا کہ آئل ٹینکرز مالکان اس مشکل وقت میں پاکستانی عوام کے ساتھ کھڑے ہیں اور تمام معاملات کو صبر و تحمل کے ساتھ آگے بڑھایا جائے گا تاکہ ایندھن کی فراہمی متاثر نہ ہو۔
انہوں نے قانون نافذ کرنے والے اداروں سے مطالبہ کیا کہ کرپٹ مافیا کے خلاف فوری اور مؤثر کارروائی کی جائے، جبکہ حکومت سے اپیل کی کہ وہ کسی بھی قسم کے دباؤ میں آئے بغیر مسائل کے حل کے لیے اقدامات کرے۔
میر شمس شاہوانی کے مطابق کرایوں اور دیگر درپیش مسائل کے حل کے لیے اسلام آباد میں وزیراعظم کے مشیر اور متعلقہ وزارتوں کے ساتھ مذاکرات کا سلسلہ جاری ہے۔
