پٹن ڈاک کے مقام پر لینڈ سلائیڈنگ کے باعث شاہراہ قراقرم ہر قسم کی ٹریفک کے لیے بند ہوگئی، جس کے نتیجے میں شدید ٹریفک جام پیدا ہوگیا اور بڑی تعداد میں سیاح اور مسافر راستے میں پھنس گئے۔
شاہراہ قراقرم کی بندش سے پاکستان اور چین کے درمیان زمینی آمدورفت بھی معطل ہوگئی، جبکہ پاک چین بارڈر کی سیر کے لیے جانے والے متعدد سیاح بھی متاثر ہوئے اور مختلف مقامات پر رکنے پر مجبور ہیں۔
مقامی پولیس حکام کے مطابق ملک کے مختلف شہروں سے گلگت بلتستان جانے والی گاڑیاں راستے میں پھنسی ہوئی ہیں، جن میں خواتین، بچے، بزرگ اور طلبہ بھی شامل ہیں۔
ادھر پھنسے ہوئے مسافروں نے اپنی مدد آپ کے تحت چھوٹی گاڑیوں کی آمدورفت کے لیے محدود راستہ بنانے کی کوشش کی ہے، جبکہ شاہراہ کے دونوں اطراف مال بردار ٹرکوں اور دیگر بڑی گاڑیوں کی طویل قطاریں لگ گئی ہیں۔
