امریکا نے ایک بار پھر دہشت گردی کے خلاف جنگ میں پاکستان کی قربانیوں کو تسلیم کرتے ہوئے افغانستان سے آنے والی دہشت گردی کے خلاف پاکستان کی حمایت کا اعلان کیا ہے۔
برطانوی خبر رساں ادارے رائٹرز کے مطابق امریکی محکمہ خارجہ نے کہا ہے کہ واشنگٹن دہشت گرد حملوں کے خلاف پاکستان کے حقِ دفاع کی حمایت کرتا ہے اور پاکستانی عوام نے دہشت گردی کے خلاف جنگ میں بے پناہ قربانیاں دی ہیں۔
رپورٹ میں مزید کہا گیا ہے کہ پاکستان اور افغانستان کے درمیان کشیدگی کا آغاز 26 فروری 2026 کو ہوا جب افغان فورسز نے سرحد پار حملے کیے، جس کے جواب میں پاکستان نے شدت پسند ٹھکانوں کے خلاف کارروائیاں کیں۔
مزید بتایا گیا ہے کہ سرحدی کشیدگی کے باعث طورخم اور چمن سمیت اہم بارڈرز بند رہے، جبکہ صرف افغان پناہ گزینوں کی واپسی جاری ہے۔
واضح رہے کہ پاکستان کا مؤقف ہے کہ کالعدم تحریک طالبان پاکستان اور دیگر گروہ افغان سرزمین کو حملوں کے لیے استعمال کر رہے ہیں۔
