اسلام آباد: وزارت مذہبی امور و بین المذاہب ہم آہنگی نے حج 2027 کے انتظامات کے لیے ابتدائی تیاریاں شروع کر دی ہیں، جبکہ خواہش مند عازمین کی رجسٹریشن کا عمل جلد شروع کیے جانے کا اعلان کیا گیا ہے۔
وزارت مذہبی امور کے مطابق سعودی حکام کی ہدایات کے پیش نظر حج 2027 کی رجسٹریشن بروقت مکمل کی جائے گی۔ رجسٹریشن کے لیے درخواست گزاروں کے پاس ایسے پاسپورٹ کا ہونا ضروری ہوگا، جس کی معیاد کم از کم 16 نومبر 2027 تک برقرار ہو۔
وزارت نے واضح کیا ہے کہ رجسٹریشن مکمل کرنے والے افراد کو سرکاری اور نجی، دونوں حج اسکیموں میں شرکت کا اختیار حاصل ہوگا۔ اس کے علاوہ بیرون ملک مقیم پاکستانیوں کے لیے بھی حج 2027 کی رجسٹریشن کا عمل کھلا ہوگا۔
حکام کے مطابق حج 2027 کی رجسٹریشن کے لیے کوئی فیس مقرر نہیں کی گئی، جبکہ حج پیکجز، اخراجات اور دیگر شرائط و ضوابط آئندہ جاری کی جانے والی حج پالیسی 2027 کے تحت جاری کیے جائیں گے۔
