خلیجی خطے میں بڑھتی ہوئی کشیدگی کے دوران سعودی عرب اور ایران کے وزرائے خارجہ کے درمیان اہم ٹیلیفونک رابطہ ہوا ہے، جسے حالیہ بحران کے بعد دونوں ممالک کے درمیان پہلا باضابطہ رابطہ قرار دیا جا رہا ہے۔
سعودی وزارت خارجہ کے مطابق سعودی وزیر خارجہ شہزادہ فیصل بن فرحان السعود نے اپنے ایرانی ہم منصب عباس عراقچی سے ٹیلیفون پر گفتگو کی۔ بات چیت کے دوران دونوں رہنماؤں نے خطے کی مجموعی صورتحال کا تفصیلی جائزہ لیا اور کشیدگی کم کرنے کے مختلف ممکنہ اقدامات پر تبادلہ خیال کیا۔
بیان کے مطابق دونوں ممالک نے اس بات پر زور دیا کہ خطے میں امن و استحکام کی بحالی کے لیے سفارتی کوششوں کو مزید تیز کرنا ناگزیر ہے۔
یہ رابطہ ایک ایسے وقت میں سامنے آیا ہے جب مشرقِ وسطیٰ میں تناؤ بڑھ رہا ہے، اور اسے علاقائی امن کی جانب ایک مثبت پیش رفت قرار دیا جا رہا ہے۔
