نیویارک: ایران سے بڑھتی کشیدگی اور جنگ بندی کی تجویز مسترد ہونے کے بعد عالمی مالیاتی منڈیوں میں بے یقینی کی لہر دوڑ گئی، جس کے نتیجے میں امریکی اسٹاک مارکیٹ وال اسٹریٹ شدید مندی کا شکار ہوگئی۔
غیر ملکی خبر رساں اداروں کے مطابق ٹیکنالوجی کمپنیوں پر مشتمل نیسڈیک انڈیکس میں 2.4 فیصد کی نمایاں کمی ریکارڈ کی گئی، جبکہ ایس اینڈ پی 500 انڈیکس 1.7 فیصد گر گیا۔ اس کے علاوہ ڈاؤ جونز انڈسٹریل ایوریج میں بھی تقریباً 1 فیصد کی کمی دیکھنے میں آئی۔
ماہرین کا کہنا ہے کہ مشرقِ وسطیٰ میں کشیدگی کے باعث سرمایہ کاروں میں تشویش بڑھ گئی ہے، جس کے نتیجے میں وہ خطرناک سرمایہ کاری سے نکل کر سونے اور دیگر محفوظ اثاثوں کی طرف رخ کر رہے ہیں۔
تجزیہ کاروں کے مطابق اگر جنگ بندی کے حوالے سے جلد کوئی مثبت پیش رفت نہ ہوئی تو عالمی معیشت کو مزید دباؤ کا سامنا کرنا پڑ سکتا ہے اور مالیاتی منڈیوں میں عدم استحکام برقرار رہنے کا خدشہ ہے۔
