الیکشن کمیشن آف پاکستان نے وزیراعلیٰ خیبرپختونخوا کے معاون خصوصی شفیع اللہ جان کو ہری پور ضمنی انتخاب سے متعلق الزامات پر نوٹس جاری کر دیا ہے اور سات دن کے اندر وضاحت طلب کر لی ہے۔
الیکشن کمیشن کے مطابق شفیع اللہ جان نے ایک یوٹیوب چینل پر ہری پور ضمنی انتخاب کے حوالے سے بے بنیاد اور گمراہ کن الزامات عائد کیے۔ نوٹس میں کہا گیا ہے کہ فارم 47 کے اجرا، فارم 45 کے اپ لوڈ نہ ہونے اور انتخابی بے ضابطگیوں سے متعلق دعوے بغیر کسی مستند شواہد کے کیے گئے۔
الیکشن کمیشن نے مؤقف اختیار کیا ہے کہ اس نوعیت کے الزامات انتخابی عمل پر عوامی اعتماد کو متاثر کر سکتے ہیں۔ نوٹس میں شفیع اللہ جان کو ہدایت کی گئی ہے کہ وہ سات روز کے اندر اپنے الزامات کی وضاحت اور شواہد پیش کریں۔
الیکشن کمیشن نے خبردار کیا ہے کہ مقررہ مدت میں جواب جمع نہ کرانے کی صورت میں قانون کے مطابق کارروائی عمل میں لائی جائے گی۔
