یمن کے حوثی باغیوں اور بین الاقوامی سطح پر تسلیم شدہ یمنی حکومت کے درمیان قیدیوں کے ایک بڑے تبادلے پر اتفاق ہو گیا ہے، جس کے تحت تقریباً 3 ہزار قیدیوں کو رہا کیا جائے گا۔ اس تبادلے میں سات سعودی شہری بھی شامل ہیں۔
غیر ملکی خبر رساں ادارے کے مطابق یہ اہم پیش رفت عمان کے دارالحکومت مسقط میں ہونے والے تقریباً دو ہفتوں پر محیط مذاکرات کے بعد سامنے آئی۔ عمان یمن کے طویل اور پیچیدہ تنازع میں ایک اہم ثالث کا کردار ادا کر رہا ہے، جو ایک دہائی سے زائد عرصے سے جاری ہے۔
یمنی حکومت کے وفد کے رکن ماجد فاضل نے تصدیق کرتے ہوئے بتایا کہ دونوں فریقین نے بڑے پیمانے پر قیدیوں کے تبادلے پر اصولی اتفاق کر لیا ہے، جس کے تحت ہزاروں جنگی قیدی رہا کیے جائیں گے۔ ان کے مطابق قیدیوں کے ناموں اور فہرستوں کا باقاعدہ تبادلہ آئندہ ایک ماہ کے اندر مکمل کر لیا جائے گا۔
تجزیہ کاروں کے مطابق قیدیوں کا یہ تبادلہ یمن میں جاری تنازع کے حل کی جانب ایک مثبت پیش رفت قرار دیا جا رہا ہے، جس سے مستقبل میں مذاکراتی عمل کو مزید تقویت ملنے کی امید ہے۔
