افغانستان سے جنم لینے والی دہشت گردی دنیا بھر کے ممالک کی سلامتی کے لیے سنگین خطرہ بنتی جا رہی ہے۔ اسی سلسلے میں کینیڈا میں دہشت گردی میں ملوث ایک اور افغان شہری کو گرفتار کر لیا گیا ہے۔
افغان جریدے کے مطابق کینیڈین پولیس نے دہشت گردی کے الزامات کے تحت ایک افغان شہری کو حراست میں لیا ہے۔ پولیس کے مطابق گرفتار ہونے والے افغان شہری کی شناخت ولید خان کے نام سے ہوئی ہے، جس کی عمر 26 سال بتائی جا رہی ہے۔
کینیڈین پولیس کے مطابق ملزم کو ٹورنٹو سے گرفتار کیا گیا، جہاں وہ دہشت گردانہ سرگرمیوں میں ملوث تھا اور اس کے مبینہ روابط عالمی دہشت گرد تنظیم داعش سے تھے۔ پولیس کا کہنا ہے کہ ولید خان داعش کو مالی وسائل فراہم کرنے، سوشل میڈیا اکاؤنٹس چلانے اور قتل کے منصوبے بنانے میں بھی ملوث رہا
پولیس کے مطابق کارروائی کے دوران ملزم کے قبضے سے بھاری مقدار میں اسلحہ اور گولہ بارود بھی برآمد کیا گیا ہے۔ واقعے کی مزید تحقیقات جاری ہیں جبکہ سیکیورٹی اداروں نے اسے ایک بڑی کامیابی قرار دیا ہے۔
