محکمہ موسمیات پاکستان نے ملک کے مختلف علاقوں میں تیز ہواؤں اور گرج چمک کے ساتھ بارش جبکہ بالائی و پہاڑی علاقوں میں برفباری کی پیشگوئی کر دی ہے۔
محکمہ موسمیات کے مطابق آج ملک کے متعدد علاقوں میں تیز ہواؤں کے ساتھ بارش کا امکان ہے، جبکہ پہاڑی علاقوں میں برفباری متوقع ہے۔ مشرقی پنجاب اور بالائی سندھ کے مختلف شہروں میں دھند اور اسموگ کی صورتحال برقرار رہنے کا خدشہ ظاہر کیا گیا ہے۔
اسلام آباد اور گرد و نواح میں مزید بارش کا امکان ہے، جبکہ مری اور گلیات میں تیز ہواؤں کے ساتھ بارش اور برفباری کی توقع کی جا رہی ہے۔ راولپنڈی، اٹک اور جہلم میں بھی بارش ہونے کے امکانات ہیں۔
پنجاب کے مختلف شہروں جن میں گوجرانوالہ، گجرات، سیالکوٹ، نارووال، ملتان، لاہور، شیخوپورہ، جھنگ، ڈیرہ غازی خان اور بہاولنگر شامل ہیں، بارش کی پیشگوئی کی گئی ہے۔ اوکاڑہ، ساہیوال، قصور، خانیوال، خانپور، بہاولپور اور رحیم یار خان میں دھند چھائے رہنے کا امکان ہے۔
