دبئی: انٹرنیشنل کرکٹ کونسل (آئی سی سی) نے پلیئرز کی نئی رینکنگ جاری کر دی ہے، جس کے مطابق پاکستان کے صائم ایوب نے آل راؤنڈرز کی فہرست میں تمام کھلاڑیوں کو پیچھے چھوڑ دیا ہے۔
ٹیسٹ بیٹرز کی رینکنگ میں پاکستان کے سعود شکیل ایک درجہ ترقی کے بعد 9ویں نمبر پر آ گئے ہیں۔ انگلینڈ کے جو روٹ بدستور پہلے نمبر پر موجود ہیں، جبکہ نیوزی لینڈ کے کین ولیمسن دوسرے اور آسٹریلیا کے اسٹیو اسمتھ تیسرے نمبر پر ہیں۔
بولرز کی ٹیسٹ رینکنگ میں آسٹریلیا کے مچل اسٹارک ایک درجہ ترقی کے بعد دوسرے نمبر پر پہنچ گئے ہیں، جبکہ پاکستان کے نعمان علی چوتھے نمبر پر موجود ہیں۔ بھارتی فاسٹ بولر جسپریت بمراہ پہلی پوزیشن پر برقرار ہیں۔
ون ڈے بیٹرز کی رینکنگ میں بھارت کے روہت شرما نے پہلی پوزیشن برقرار رکھی ہے، ویرات کوہلی دوسرے نمبر پر ہیں، جبکہ پاکستان کے بابر اعظم چھٹے نمبر پر موجود ہیں۔
ٹی ٹوئنٹی بیٹرز کی رینکنگ میں پاکستان کے صاحبزادہ فرحان ایک درجہ تنزلی کے بعد چھٹے نمبر پر چلے گئے ہیں۔ بھارت کے ابھیشک شرما بدستور پہلے نمبر پر ہیں، جبکہ تلک ورما دو درجے بہتری کے بعد چوتھے نمبر پر آ گئے ہیں۔ پاکستان کے بابر اعظم ایک درجہ تنزلی کے بعد 31ویں نمبر پر پہنچ گئے ہیں۔
