جدہ: سعودی عرب میں محکمہ موسمیات نے ملک کے 9 ریجنز کے لیے موسمی ہائی الرٹ جاری کر دیا ہے اور موسم کو غیر یقینی قرار دیا ہے۔
محکمہ موسمیات کے مطابق بعض علاقوں میں شدید جبکہ بعض میں ہلکی سے درمیانی بارش، برفباری، تیز ہوائیں، گرج چمک اور حدِ نگاہ میں کمی کے امکانات ہیں۔
ہائی الرٹ آج بدھ کی صبح فجر کے وقت سے شام تک نافذ رہے گا، اور ممکنہ اثرات کے پیش نظر مسلسل نگرانی اور احتیاطی تدابیر کی ہدایت کی گئی ہے۔
موسمی غیر یقینی صورتحال کے باعث مشرقی ریجن کے متعدد شہروں میں اسکول بند رکھنے کا اعلان کیا گیا ہے، جن میں حفر الباطن، الخفجی، النعیریہ، قریۃ العلیا، الاحساء، بقیق، الجبیل، الخبر، الدمام، القطیف اور رأس تنورہ شامل ہیں۔
رپورٹس کے مطابق یہ موسمی کیفیت دوپہر 12 بجے سے رات 11 بجے تک جاری رہے گی، اور اس دوران تیز ہوائیں اور گرج چمک متوقع ہے، جس سے حدِ نگاہ متاثر ہو سکتی ہے۔
