پاکستان: عالمی خلائی کانفرنس “آئی کاسٹ 2025” کا آغاز

اسلام آباد: پاکستان میں عالمی خلائی کانفرنس “آئی کاسٹ 2025” کا آغاز ہونے جارہا ہے، جس میں اہم معاہدوں پر دستخط متوقع ہے۔
تفصیلات کے مطابق پاکستان میں عالمی خلائی کانفرنس “آئی کاسٹ2025” کا آغاز 18 نومبر کو ہوگا، جس میں 25 ممالک کے نمائندگان شرکت کریں گے۔
ترجمان سپارکو نے بتایا کانفرنس کے دوران مختلف ممالک کے ساتھ اہم معاہدوں پر دستخط متوقع ہے، کانفرنس کا موضوع ’’پائیدار ترقی کیلئے خلائی سائنس اور ٹیکنالوجی کا کردار‘‘ رکھا گیا ہے۔
ترجمان کا کہننا تھا کہ کانفرنس کے دوران موسمی تبدیلی، غذائی تحفظ، آفات سے نمٹنے اور پائیدار انفراسٹرکچر جیسے موضوعات پر خصوصی سیشنز منعقد ہوں گے۔
کانفرنس سپارکو اور انسٹیٹیوٹ آف اسپیس ٹیکنالوجی کے اشتراک سے منعقد ہو رہی ہے اور اس میں 2 ہزار سے زائد ملکی و غیر ملکی ماہرین شریک ہوں گے۔
کانفرنس میں ترکیہ، منگولیا اور امریکہ کے خلا باز بھی شامل ہوں گے۔ علاوہ ازیں، رویتِ ہلال کے سائنسی، مذہبی اور تکنیکی پہلوؤں پر بھی خصوصی سیشن منعقد کیا جائے گا۔
ترجمان سپارکو نے بتایا کہ مختلف ممالک اور اداروں کے ساتھ متعدد مفاہمتی یاداشتوں پر دستخط متوقع ہیں، جس سے پاکستان کو خلائی شعبے میں قائدانہ کردار اور عالمی تعاون کے وژن کو فروغ ملے گا۔کانفرنس پاکستان کو خطے میں سائنسی تبادلے اور جدت کا اہم مرکز بنانے میں مددگار ثابت ہوگی۔