ظہران ممدانی کا میئر بننے کے بعد ٹرمپ کے خلاف پہلا بیان

نیویارک (60 نومبر 2025): نیویارک سٹی کے نو منتخب میئر ظہران ممدانی کا کہنا ہے کہ اگر صدر ٹرمپ نے شہر کو نقصان پہنچانے کی کوشش کی تو وہ عدالت میں ان کا مقابلہ کرنے کے لیے تیار ہیں۔
نیویارک کے میئر بننے کے بعد ظہران ممدانی نے اے بی سی کے پروگرام ’گُڈ مارننگ امریکا‘ میں اپنی انتخابی فتح کے بعد دیے گئے پہلے انٹرویو میں کہا صدر ٹرمپ اجتماعی طور پر سب کو نقصان پہنچا رہے ہیں، اگر انھوں نے فنڈ روک کر نیویارک کے عوام کو سزا دی تو ہر سطح پر مقابلہ کریں گے۔
انھوں نے کہا کہ وہ نیویارک کی بجت کٹوتی کے خلاف مزاحمت کریں گے، ٹرمپ کی دھمکیاں دینے کا مقصد صرف خوف پیدا کرنا ہے۔ واضح رہے کہ جیت کے بعد صدر ٹرمپ اور میئر نیویارک نے کوئی رابطہ نہیں کیا ہے، میئر نے کہا میرے دروازے سب کے لیے کھلے ہیں، ذاتی نہیں نیویارک کے لیے بات کرنے کے لیے تیار ہوں۔
نو منتخب میئر ظہران ممدانی کی اہلیہ راما دواجی کے لئے بڑا اعزاز
خیال رہے کہ ممدانی انیسویں صدی کے بعد نیویارک سٹی کے سب سے کم عمر میئر بننے جا رہے ہیں، اور ساتھ ہی شہر کے پہلے مسلم اور جنوبی ایشیائی نژاد میئر ہوں گے۔
ان کے پُراثر جوش، بلند آہنگ تقاریر اور سوشل میڈیا پر مہارت نے نوجوان ووٹروں اور تارکینِ وطن کمیونٹیوں کو بڑی تعداد میں ووٹ ڈالنے پر آمادہ کیا۔ ممدانی کی جیت کی خبر دنیا کے اُن خطوں تک بھی پہنچی جہاں عام طور پر امریکی مقامی انتخابات کی کوئی بازگشت نہیں ہوتی۔