عوامی مسلم لیگ کے سربراہ کو ایئرپورٹ پر عمرے پر جانے سے روک دیا گیا

اسلام آباد : عوامی مسلم لیگ کے سربراہ شیخ رشید احمد کو اسلام آباد ایئرپورٹ پر عمرے پر جانے سے روک دیا گیا، جس پر انھوں نے عدالتی احکامات کی خلاف ورزی پر توہین عدالت دائر کرنے کا اعلان کردیا۔
تفصیلات کے مطابق عوامی مسلم لیگ کے سربراہ شیخ رشید احمد کو اسلام آباد ایئرپورٹ پر امیگریشن حکام نے بیرون ملک جانے سے روک دیا۔ وہ عمرے کی ادائیگی کے لیے روانہ ہو رہے تھے۔
شیخ رشید کے وکیل سردار شہباز نے بتایا کہ گزشتہ روز لاہور ہائی کورٹ راولپنڈی بینچ نے تحریری حکم جاری کیا تھا، جس میں ان کو عمرے پر جانے کی اجازت دی گئی تھی۔
ایئرپورٹ پر روکے جانے کے بعد اپنے ویڈیو بیان میں شیخ رشید نے کہا کہ “ہائی کورٹ کا تحریری حکم نامہ میرے پاس ہے اور اس کی نقل اداروں کو دی جا چکی ہے، لیکن عمرے کی ادائیگی کے لیے ایئرپورٹ پہنچا تو مجھے روک دیا گیا۔”
انہوں نے مزید کہا کہ “احکامات کی خلاف ورزی پر توہین عدالت کی درخواست دائر کروں گا جو جسٹس صداقت علی خان کی عدالت میں جمع کراؤں گا۔
سربراہ عوامی مسلم لیگ نے بتایا ایئرپورٹ پر عابد خان اور توقیر نے مجھے روکا، ہائی کورٹ کا حکم ماننے سے انکار کر دیا گیا، جس ملک میں ہائی کورٹ کا حکم نہ چلے تو پھرالللہ کی طرف دیکھنا چاہیے۔