پاکستانی ٹیم کے سابق کپتان بابر اعظم نے جنوبی افریقہ کے خلاف ٹی ٹوئنٹی سیریز کے پہلے میچ میں شاہد آفریدی کا ناپسندیدہ ریکارڈ برابر کر دیا۔
قومی ٹیم کے سابق کپتان بابر اعظم صرف دو گیندوں پر بغیر کوئی رن بنائے پویلین لوٹ گئے، انہیں کوربن بوش نے پاور پلے کے آخری اوور میں آؤٹ کیا۔
بابر اعظم نے اس اننگز کے ساتھ ٹی ٹوئنٹی انٹرنیشنل میں آٹھویں مرتبہ صفر پر آؤٹ ہونے کا شاہد آفریدی کا ناپسندیدہ ریکارڈ برابر کر دیا۔
بابر اعظم ٹی ٹوئنٹی انٹرنیشنل میں 8 ویں مرتبہ صفر پر آؤٹ ہونے کے بعد سب سے زیادہ مرتبہ صفر پر آؤٹ ہونے والے پاکستانی پلیئرز کی فہرست میں شاہد آفریدی کے ساتھ تیسرے نمبر پر آگئے، اس فہرست میں عمر اکمل، صائم ایوب اور کامران اکمل بھی شامل ہیں۔
واضح رہے کہ گزشتہ روز ہونے والے میچ میں جنوبی افریقہ نے 55 رنز سے کامیابی سمیٹ لی تھی، 195 رنز کے ہدف کے تعاقب میں پاکستان کی پوری ٹیم 18.1 اوورز میں 139 رنز پر پویلین لوٹ گئی تھی۔
کوربن بوش نے جنوبی افریقہ کی جانب سے چار کھلاڑیوں کو پویلین کی راہ دکھائی تھی، جبکہ ریزا ہینڈرکس نے 40 گیندوں پر 60 رنز کی شاندار اننگز کھیل کر ٹیم کی جیت کی بنیاد رکھ دی تھی۔
پاکستان کی طرف سے محمد نواز نمایاں بولر رہے، جنہوں نے 26 رنز کے عوض 3 کھلاڑی آؤٹ کیے جبکہ صائم ایوب نے 37 اور نواز نے 36 رنز بنائے۔
