افغان تارکین وطن برطانیہ میں بھی مسئلہ بن گئے

لندن میں افغان تارکین وطن نے چاقو سے حملہ کرکے ایک شخص کو ہلاک اور دو کو زخمی کردیا۔ واقعہ مڈ ہرسٹ گارڈنز آکس برج کے علاقہ میں پیش آیا۔
غیر ملکی ذرائع ابلاغ کے مطابق برطانیہ کی پولیس نے 22 سال کے افغان ملزم کو ٹیزرگن سے نشانہ بنا کر موقع سے گرفتار کرلیا۔ مقتول مقامی کمیونٹی کا معزز رکن اور کونسل ممبر تھا۔
حملے کے وقت وہ اپنے کتے کو گھما رہا تھا۔ حملہ آور افغان نے اس کے گلے پر چھری سے وار کیا جس سے وہ موقع پر ہی دم توڑ گیا۔
دوسرے واقعے میں امریکا میں غیر قانونی طورپر مقیم بھارتی نے دوران پرواز دو کم عمرلڑکوں کو دھات کے کانٹے زخمی کردیا۔ روکنے کی کوشش کرنے پرایئرہوسٹس کو بھی زخمی کیا۔ مسافروں نے بھارتی حملہ آور کو قابو کرلیا۔
واقعہ شکاگو سے فرینکفرٹ جانے والی پرواز میں پیش آیا۔ حملہ کے بعد طیارہ کا رخ بوسٹن کی جانب موڑ دیا گیا۔
جہاں ایئرپورٹ پر ملزم انیت کمار اسیری پالی کو گرفتار کرلیا گیا۔ ملزم اسٹوڈنٹ ویزے پر امریکا آیا تھا لیکن اس کا ویزا ختم ہوچکا تھا۔
دوسری جانب ایران نے منشیات سے متعلق جرم میں ایک افغان قیدی کو پھانسی دے دی۔
میڈیا رپورٹس کے مطابق ایران کی جیل میں قید ایک افغان قیدی کو منگل کے روز یزد سینٹرل جیل میں 2 ایرانی شہریوں کے ساتھ منشیات سے متعلق الزامات پر پھانسی دے دی گئی، افغان شہری اسلام میر سعید کو 20 اکتوبر کو یزد کی مرکزی جیل میں سزائے موت دی گئی تھی۔
59 سالہ اسلام میر سعید کے 21 سالہ بیٹے کو بھی جرم میں مبینہ شراکت کے الزام میں 9 سال قید کی سزا سنائی گئی ہے اور وہ تاحال جیل میں قید ہے۔
افغان میڈیا کا کہنا ہے کہ منشیات سے متعلق جرائم میں قید 7 ایرانی شہریوں کو بھی اتوار کے روز تبریز، سمنان، ملایر، بروجرد، قزوین، اور گرگان کی مختلف جیلوں میں پھانسی دی گئی۔