پاکستان ٹی 20 ٹیم کے کپتان سلمان علی آغا نے عثمان خان کو جنوبی افریقا کے خلاف سیریز میں شامل کرنے کی وجہ بتادی۔
راولپنڈی کرکٹ اسٹیڈیم میں پریس کانفرنس کرتے ہوئے سلمان علی آغا نے کہا کہ ٹیم کو ایک ایسا وکٹ کیپر بیٹر چاہیے جو مڈل اوورز میں خاص طور پر اسپن کے خلاف بیٹنگ کرسکے۔
انہوں نے کہا کہ میرا ماننا ہے کہ آگے جاکر ہمیں ٹی 20 ورلڈ کپ میں سری لنکا جانے سے پہلے بھی بہت زیادہ اسپن کھیلنا پڑ سکتا ہے۔
سلمان علی آغا نے کہا کہ اگرچہ بین الاقوامی کرکٹ میں عثمان کا ریکارڈ اتنا اچھا نہیں ہے لیکن آپ نے پی ایس ایل میں دیکھا ہوگا کہ وہ اسپن کے خلاف درمیانی اوورز میں واقعی اچھی بیٹنگ کی تھی۔
واضح رہے کہ عثمان خان نے یو اے ای میں مقیم غیرملکی کھلاڑی کے طور پر پی ایس ایل 9 میں حصہ لیا لیکن سیزن میں شاندار کارکردگی کی وجہ سے انہیں ٹی 20 ورلڈ کپ 2024 سے قبل پاکستانی ٹیم کا حصہ بنایا گیا تھا۔
عثمان خان نے اب تک پاکستان کے لیے 19 ٹی 20 اور 2 ون ڈے کھیلے ہیں جس میں ایک نصف سنچری کی مدد سے تمام فارمیٹس میں 290 رنز بنائے ہیں۔
انہوں نے پاکستان کے لیے آخری انٹرنیشنل میچ اپریل میں ہوئی تھی جب گرین شرٹس نے وائٹ بال سیریز کے لیے نیوزی لینڈ کا دورہ کیا تھا۔
