پیپلزپارٹی کے جیالوں نے بلاول ہاؤس لاہور کی سیکیورٹی خود سنبھال لی، فوٹیج جاری

لاہور: پاکستان پیپلزپارٹی کے جیالوں نے بلاول ہاؤس لاہور کی سیکیورٹی خود سنبھال لی ہے، جس کی فوٹیج بھی منظرعام پر آگئی ہے۔
تفصیلات کے مطابق پنجاب حکومت کی جانب سے سیکیورٹی ہٹانے کے بعد پیپلزپارٹی کے جیالوں نے بلاول ہاؤس لاہور کی سیکیورٹی خود اپنے ذمے لےلی ہے، اس کی فوٹیج بھی جاری کی گئی ہے۔
جنرل سیکریٹری پیپلزپارٹی لاہور جمیل منج نے جیالوں کیساتھ بلاول ہاؤس کے سامنے گشت کیا، پیپلزپارٹی کے جیالوں نے بلاول ہاؤس کی سیکیورٹی کیلئے ڈنڈے تھام رکھے ہیں۔
پیپلزپارٹی کی جانب سے سینئر وزیر مریم اورنگزیب اور صوبائی وزیراطلاعات عظمیٰ بخاری کے سیکیورٹی نہ ہٹانے کے دعوؤں کی تردید کی گئی ہے۔
بلاول ہاؤس لاہور کی سیکیورٹی ہٹانے پر پیپلزپارٹی پنجاب حکومت پر سخت برہم ہے، پی پی ذرائع کے مطابق 2 دن سے بلاول ہاؤس لاہور میں پولیس اہلکار نہیں ہیں۔
جنرل سیکریٹری پیپلزپارٹی لاہور جمیل منج کا کہنا تھا کہ پنجاب حکومت نے بلاول ہاؤس لاہور سے سیکیورٹی واپس لےلی ہے، 2 دن سے بلاول ہاؤس لاہور میں پولیس اہلکار موجود نہیں ہیں۔
بلاول ہاؤس لاہورکی سیکیورٹی کے معاملے میں رہنما پیپلزپارٹی حسن مرتضیٰ کا ردعمل بھی سامنے آیا تھا، ان کا کہنا تھا کہ پنجاب حکومت سے علی حیدر گیلانی کا ایک گارڈ برداشت نہیں ہوا۔
حسن مرتضیٰ نے کہا کہ پنجاب حکومت بلاول ہاؤس کو کیا سیکیورٹی دے سکے گی، عظمیٰ بخاری پہلے ہمیں کونسی سیکیورٹی دیتی تھیں جو اب ہم ان کے بھروسے بیٹھے ہیں