انٹیلی جنس بیسڈ آپریشن میں مقابلے کے دوران دو انتہائی مطلوب دہشت گرد ہلاک

بنوں میں سی ٹی ڈی نے انٹیلی جنس بیسڈ آپریشن میں مقابلے کے دوران دو انتہائی مطلوب دہشت گرد ہلاک کردیے۔
ڈی آئی جی سجاد خان کا کہنا ہے انٹیلی جنس بیسڈ آپریشن میں دہشت گردوں کا ماسٹر مائنڈ راشدین عرف ملنگ یار بھی جہنم واصل ہوا، جو چار سی ٹی ڈی اہلکاروں کی شہادت میں ملوث تھا۔
دوسرے دہشت گرد کی شناخت خالد عثمان کے نام سے ہوئی ہے، لاک دہشت گردوں کے قبضے سے 2 عدد کلاشنکوف، 6 میگزین، 23 راؤنڈز، دو دستی بم، دو موبائل فونز اور کالعدم ٹی ٹی پی کے دو کارڈز برآمد ہوئے ہیں۔
سی ٹی ڈی کو خفیہ اطلاع موصول ہوئی تھی کہ کالعدم تنظیم (فتنہ الخوارج) سے تعلق رکھنے والے دہشت گرد تھانہ ڈومیل کی حدود میں واقع کمپنی روڈ پر دہشت گردی کی ایک بڑی کارروائی کی منصوبہ بندی کر رہے ہیں، جس پر سی ٹی ڈی کی خصوصی ٹیم نے ضلعی پولیس کے ہمراہ فوری طور پر علاقے کا گھیراؤ کیا۔
سی ٹی ڈی کا کہنا ہے دونوں دہشت گرد پولیس پر حملوں میں بھی مطلوب تھے، مفرور دہشت گردوں کی گرفتاری کے لیے سرچ آپریشن کیا جا رہا ہے۔