کولمبو: ویمنز او ڈی آئی ورلڈکپ میں پاک بھارت میچ کے دوران زمین پر بیٹ مارنے پر آئی سی سی نے پاکستانی ویمن کرکٹر سدرہ امین کو وارننگ جاری کر دی۔
رپورٹس کے مطابق آئی سی سی نے پاکستانی ویمن کرکٹر سدرہ امین کو ضابطہ اخلاق کی خلاف ورزی پر وارننگ جاری کی ہے۔
آئی سی سی کا کہنا ہے کہ بھارت کیخلاف آؤٹ ہونے کے بعد سدرہ نے بیٹ زمین پر مارا، سدرہ امین کو ایک ڈی میرٹ پوائنٹ بھی دیا گیا۔
آئی سی سی کے مطابق سدرہ امین نے اپنی غلطی تسلیم کرلی ہے، سماعت کی ضرورت پیش نہیں آئی۔
دوسری جانب ویمنز او ڈی آئی ورلڈکپ میں ہونے والے بھارت اور پاکستان کے میچ میں نیا تنازع کھڑا ہوگیا، پاکستانی اوپنر منیبہ کا غلط رن آؤٹ دیدیا گیا۔
بھارت کیخلاف پاکستانی اوپنرز نے اننگز کا آغاز سست طریقے سے کیا پاکستانی اوپنرز بھارتی بولنگ کے خلاف جدوجہد کرتی نظر آئیں، تاہم اوپنر منیبہ علی کے غلط رن آؤٹ نے نیا تنازع کھڑا کردیا، امپائر نے ناٹ آؤٹ دینے کے بعد انھیں اچانک آؤٹ قرار دیا۔
بھارت کیخلاف اہم میچ میں پاکستانی بلیباز منیبہ علی کے غلط رن آؤٹ پر کمنٹیٹر اور میدان میں موجود شائقین سب حیران نظر آئے۔
رن اؤٹ کی اپیل پر منیبہ علی کو تھرڈ امپائر نے پہلے ناٹ آؤٹ قرار دیا پھر آؤٹ قرار دیا، منیبہ علی اور پاکستانی کپتان فاطمہ ثنا نے فیصلے پر ناراضی کا اظہار کیا۔
فاطمہ ثنا نے غصے کا اظہارکرکے امپائر کو احتجاج ریکارڈ کروایا، پاکستانی کپتان باؤنڈری لائن پر امپائر سے کافی دیر بچث کرتی بھی نظر آئیں۔
واضح رہے کہ منیبہ علی کریز میں تھیں لیکن جس وقت بال اسٹمپس پر لگی تو بیٹ ہوا میں تھا، قانون کے مطابق بیٹر ایک بار کریز میں آجائے تو بیٹ ہوا میں ہونے پر رن آؤٹ نہیں ہوتا
