کبھی نہیں دیکھا کہ چیمپئن ٹیم کو ٹرافی سے محروم کیا جائے: بھارتی کپتان سوریا کمار یادو

دبئی(29 ستمبر 2025): بھارتی کپتان سوریا کمار یادو نے کہا کہ کبھی نہیں دیکھا کہ چیمپئن ٹیم کو اس کی محنت سے کمائی گئی ٹرافی سے محروم کیا جائے۔
سوریا کمار یادیو نے پریس کانفرنس میں شرمندہ ہونے کے بجائے شکوہ کیا کہ میں نے کبھی نہیں دیکھا کہ ایک چیمپئن ٹیم کو اس کی محنت سے کمائی گئی ٹرافی سے محروم کیا جائے، یہ کوئی آسان ٹورنامنٹ نہیں تھا ہم 4 ستمبر سے یہاں تھے، دو شاندار میچز کھیلے، ہم نے ایشیاکپ کی ٹرافی کو محسوس کرلیا ہے۔
سوریاکمار نے کہا مجھے لگتا ہے کہ ہم اس کے مستحق تھے، انہوں نے مزید کہا کہ ہم یہ نہیں کہہ رہے کہ ہم مایوس تھے، ہم گراؤنڈ پر موجود تھے، پوڈیم پر اس لمحے سے لطف اندوز ہو رہے تھے اور ہمارے چہروں پر مسکراہٹیں تھیں۔
بھارت نے ایشین کرکٹ کونسل کے صدر اور پاکستان کرکٹ بورڈ کے چیئرمین محسن نقوی سے ایشیا کپ کی ٹرافی لینے سے انکار کر دیا، جس کی وجہ سے پوسٹ میچ پریزنٹیشن میں کافی تاخیر ہوئی، اس تنازع کی وجہ سے بھارتی ٹیم ٹرافی کے بغیر رہ گئی۔
سوریاکمار کا کہنا تھا کہ ٹرافی نہ لینے کا فیصلہ خود کھلاڑیوں نے کیا تھا، انہوں نے کہا کہ انہیں بی سی سی آئی اور اے سی سی کے درمیان کسی سرکاری رابطے کے بارے میں کوئی علم نہیں۔
اس کے علاوہ سوریا کمار نے پریس کانفرنس میں پاکستانی صحافیوں کے سوالات لینے سے بھی انکار کیا، ہاتھ نہیں ملایا، فوٹو شوٹ نہیں کروایا، کرکٹ میں سیاست کو لائے، صحافی نے اس طرح کے سوال سے جب بھارتی کپتان کو آئینہ دکھادیا تو سوریا کمار یادو جواب دینے کے بجائے بات گھماتے رہے اور میڈیا منیجر سے پوچھا جواب دینا ہے یا نہیں۔
بھارتی ٹیم کی ہٹ دھرمی، صدر اے سی سی بھی ڈٹ گئے، ایشیا کپ کی انتظامیہ ٹرافی اپنے ساتھ لے گئی