پاکستان کا فلسطینی ریاست کو تسلیم کرنے والے ممالک کے اعلانات کا خیر مقدم

تفصیلات کے مطابق پاکستان کے نائب وزیر اعظم اسحاق ڈار نے اپنے ایک ٹویٹ میں کہا کہ وہ فرانس، برطانیہ، کینیڈا و دیگر ممالک کے اعلانات کا خیر مقدم کرتے ہیں، یہ اعلانات فلسطینی عوام کے جائز حقوق کی فتح ہے، دیگر ممالک بھی بین الاقوامی قانون کے مطابق فلسطینی ریاست تسلیم کریں۔
ان کا مزید کہنا تھا کہ دو ریاستی حل منصفانہ، جامع اور دیرپا امن کے حصول کی جانب اہم قدم ہے۔
ترجمان دفتر خارجہ نے ایک بیان میں کہا کہ مسئلہ فلسطین پر سعودی عرب اور فرانس کی میزبانی میں اعلیٰ سطح کے اجلاس میں نائب وزیر اعظم اسحاق ڈار نے پاکستان کی نمائندگی کی، مزید ممالک کی جانب سے فلسطین کو تسلیم کیے جانے سے اجلاس کی اہمیت بڑھ گئی۔
حماس اور تمام دھڑے ہتھیار فلسطینی اتھارٹی کے حوالے کر دیں، محمود عباس
اجلاس کے اختتام پر مسئلہ فلسطین کے تصفیے کے لیے پاکستان نے اعلان نیویارک کی مکمل حمایت کی، اعلان نیویارک کی حمایت منصفانہ و پائیدار امن سے پاکستان کی وابستگی کا اظہار ہے، دفتر خارجہ نے کہا پاکستان 1988 میں فلسطین کو تسلیم کرنے والے اوّلین ممالک میں شامل ہے، اور پاکستان فلسطین کو اقوام متحدہ کا مکمل رکن بنانے کا حامی ہے۔
سعودی وزیر خارجہ فیصل بن فرحان نے اپنے خطاب میں کہا کہ دو ریاستی حل کانفرنس امن کے حصول کا تاریخی موقع ہے، فرانس کے فلسطینی ریاست تسلیم کرنے کے اقدام کا خیر مقدم کرتے ہیں۔
فلسطینی صدر محمود عباس نے عالمی برادری سے آزاد فلسطین کی حمایت کی اپیل کی اور کہا ہم ریاست فلسطین کو تسلیم کرنے والے ممالک کے مؤقف کو سراہتے ہیں، عالمی شناخت کو متحرک کرنے پر سعودی عرب اور فرانس کے کردار کی تعریف کرتا ہوں