’’ناٹ آؤٹ‘‘ سوشل میڈیا پر ٹاپ ٹرینڈ بن گیا!

دبئی میں کھیلے جا رہے ایشیا کپ کے سپر فور مرحلے کے پاک بھارت میچ میں تھرڈ امپائر کی جانب سے فخر زمان کا متنازع آؤٹ دیا جانا سوشل میڈیا پر ٹاپ ٹرینڈ بن گیا ہے۔
چیمپئنز ٹرافی 2017 کے ہیرو فخر زمان نے جارحانہ انداز اختیار کرتے ہوئے 8 گیندوں پر تین چوکوں کی مدد سے 15 رنز اسکور کر چکے تھے۔
پاکستانی اننگ کے تیسرے اوور میں پانڈیا کی ایک گیند فخر زمان کے بلے کا کنارا چھوتے ہوئے وکٹ کیپر سنجو سمپسن کے پاس گئی۔ تاہم کیچ مشکوک ہونے کے باعث کاٹ بی ہائینڈ کا فیصلہ تھرڈ امپائر کے پاس گیا۔ ری پلے میں کئی بار اس کو دیکھا گیا۔
زوم ری پلے میں گیند واضح طور پر وکٹ کیپر کے گلوز میں جانے سے پہلے زمین کو چھوتی ہوئی دکھائی دی۔ تاہم تھرڈ امپائر نے فخر زمان کو آؤٹ قرار دے دیا۔
کمنٹیٹرز بھی یہی کہتے رہے کہ شک کا فائدہ بلے باز کو دیا جانا چاہیے تھا۔ فخر زمان تو تھرڈ امپائر کا فیصلہ کے بعد حیران تھے ہی، جب وہ ڈریسنگ روم پہنچے تو کوچ بھی ہکا بکا تھے۔
سابق قومی کپتان محمد حفیظ بھی یہ کہے بغیر نہ رہ سکے کہ بھارت اور آن فیلڈ امپائرنگ کو پچھاڑنے کے لیے اے پلس گیم درکار ہے۔
فخر زمان کے اس طرح آؤٹ دیے جانے پر جہاں سابق پاکستانی کرکٹرز سمیت بھارت میں بھی کرکٹ کی سوجھ بوجھ رکھنے والے افراد اسے امپائر کا غلط فیصلہ قرار دے رہے ہیں۔ وہیں سوشل میڈیا پر طوفان برپا ہوچکا ہے اور ’’ناٹ آؤٹ‘‘ کے نام سے ٹاپ ٹرینڈ بن گیا ہے۔
اب تک لاکھوں صارفین اس پر اپنی رائے کا اظہار کرتے ہوئے فخر زمان کو ناٹ آؤٹ قرار دے رہے ہیں۔ کچھ صارفین تو اس کو پاکستان بمقابلہ بھارتی کرکٹ ٹیم اور امپائر بھی قرار دے چکے ہیں۔
سوشل میڈیا صارفین نے مذکورہ کیچ سے متعلق ویڈیوز بھی شیئر کیں اور امپائر کے فیصلے کو بھارت کے حق میں جانبدارانہ بھی قرار دیا۔
صارفین نے کئی طنزیہ پوسٹ کرتے ہوئے لکھا کہ بھارت چیٹنگ کے بغیر نہیں جیت سکتا۔ تھرڈ امپائر روچیرا وہی امپائر ہیں، جنہوں نے پچھلے میچ میں بھی ہر اپیل پر اپنی انگلی اٹھائی تھی