وزیراعلیٰ سندھ کی تبدیلی کی باتوں میں سچائی نہیں، بلاول بھٹو

پاکستان پیپلز پارٹی کے چیئرمین بلاول بھٹو زرداری نے کراچی میں پانی کے منصوبے کا افتتاح کرنے کے بعد میڈیا سے گفتگو کرتے ہوئے پاک سعودی عرب کے درمیان طے پانے والے دفاعی معاہدے پر وزیراعظم شہباز شریف اور ان کی ٹیم کو مبارکباد پیش کرتے ہوئے اس کو اہم پیش رفت قرار دیا ہے۔
بلاول بھٹو نے کہا کہ یہ معاہدہ ہونے کی بنیادی وجہ پاکستان کی بھارت کے خالف جنگ میں بڑی کامیابی ہے۔ حرمین شریفین کی حفاظت کا فریضہ وطن عزیز کے لیے بڑے اعزاز کی بات ہے۔
اس موقع پر بلاول بھٹو سے سوال کیا گیا کہ آج کل وزیراعلیٰ سندھ مراد علی شاہ کی تبدیلی کی باتیں بھی ہو رہی ہیں تو انہوں کہا کہ وزیراعلی سندھ کی تبدیلی کی بات بھی صحافی خود کرتے ہیں اور پھر مجھ سے ہی اس تبدیلی کا سوال پوچھ لیتے ہیں۔ تاہم مراد علی شاہ کی تبدیلی کی خبروں میں کوئی سچائی نہیں ہے۔
پی پی چیئرمین نے ایک بار پھر اپنا مطالبہ دہرایا کہ سیلاب متاثرین کو بینظیر انکم سپورٹ پروگرام کے ذریعے ہی امداد ملنی چاہیے۔
صدر زرداری کے دورہ چین سے متعلق بلاول بھٹو کا کہنا تھا کہ انہوں نے اپنی پہلی مدت میں بھی سب سے زیادہ دورے چین کے کیے تھے، جس کے نتیجے میں پاکستان کو گوادرپورٹ اور سی پیک جیسے منصوبے حاصل ہوئے۔ اب اس مدت میں بھی آصف زرداری کا پاکستان کے علاوہ سب سے زیادہ وقت چین میں ہی گزرے گا۔
کراچی میں پانی کا مسئلہ حل کرنے پر توجہ ہے، بلاول بھٹو