کراچی : لیاقت آباد کے مشتعل عوام سڑکوں پر نکل آئے، بد ترین ٹریفک جام

شہر قائد کے علاقے لیاقت آباد میں بجلی کی دو روز سے بندش پر کے الیکٹرک کے خلاف احتجاجی مظاہرہ کیا گیا، جس کے باعث بد ترین ٹریفک جام ہوگیا۔
ڈاک خانہ کے قریب ہونے والے احتجاج میں مشتعل مظاہرین کی جانب سے کے الیکٹرک کی ظالمانہ پالیسیوں اور بجلی کی بندش پر شدید غم و غصہ کا اظہار کیا گیا۔
مظاہرین نے بتایا کہ لیاقت آباد سی ایریا میں گزشتہ 2 دن سے بجلی کی فراہمی مکمل طور پر بند ہے اسے فوری بحال کیا جائے۔
مشتعل مظاہرین نے ٹائرجلا کر سڑک دونوں اطراف سے بند کردی، جس کے باعث شاہراہ لیاقت پر بد ترین ٹریفک جام ہوگیا۔
راستوں کی بندش پر ایک خاتون مسافر نے بس سے اتر کر مظاہرین سے تکرار کی اور راستہ کھولنے کو کہا، دوسری جانب پنجاب سے آئے ہوئے باراتی بھی ٹریفک جام میں پھنس گئے۔
تازہ ترین رپورٹ کے مطابق آخری اطلاعات تک انتظامیہ اور مظاہرین میں مذاکرات جاری تھے اور احتجاج ختم کرنے کا فیصلہ نہیں ہو سکا تھا۔