جدہ سمیت مکہ مکرمہ اور مدینہ منورہ میں بارش کا قوی امکان

سعودی عرب میں محکمہ موسمیات کا کہنا ہے کہ آج جمعرات کو جدہ سمیت مکہ مکرمہ اور مدینہ منورہ ریجنوں کے متعدد شہروں میں بارش کا قوی امکان ہے۔
سعودی خبر رساں ادارے کی رپورٹ کے مطابق محکمہ موسمیات کا کہنا تھا کہ ’جدہ اور دیگر ساحلی شہروں میں تیز ہوا بھی چلے گی جبکہ اونچی موجیں اٹھیں گی‘۔
رپورٹس کے مطابق اللیث، طائف، اضم، بنی یزید اور العرضیات میں کہیں ہلکی اور کہیں درمیانے درجے کی بارش کا امکان ہے۔
مدینہ منورہ ریجن کے شروں ینبع اور الرایس میں بھی جہاں 49 کلو میٹر فی گھنٹہ کی رفتار سے ہوا چلے گی اور شام تک بارش کا امکان ہے۔
محکمے نے کہا ہے کہ ’الباحہ، عسیر اورجازان میں بھی آج کہیں تیز اور کہیں درمیانے درجے کی بارش ہوگی‘۔
ریاض اور مشرقی ریجن کے حوالے سے محکمے کا کہنا تھا کہ متعدد شہروں میں ہلکی بارش کا امکان ہے جبکہ گرد آلود ہوا چلے گی جس سے حد نگاہ متاثر رہے گی۔
اس سے قبل بھی سعودی عرب مدینہ منورہ میں باران رحمت برسنے سے موسم خوشگوار ہوگیا تھا، جبکہ بارش کے دوران زائرین نے رب کے حضور دعائیں مانگیں۔
رپورٹس کے مطابق مسجد نبوی صلی اللہ علیہ وآلہ وسلم میں بھی باران رحمت جم کر برسا جس کی ویڈیوز سوشل میڈیا پر بھی گردش کررہی ہیں۔
باران رحمت برسنے سے مدینہ منورہ میں گرمی کی شدت میں کمی آئی اور موسم خوشگوار ہوگیا تھا۔