وال اسٹریٹ جنرل کا انکشاف

(10 ستمبر 2025): امریکی اخبار وال اسٹریٹ جرنل (ڈبلیو ایس جے) نے اسرائیل کے قطری دارالحکومت دوحہ پر حملے کے بارے میں امریکا کو پہلے سے علم ہونے کا دعویٰ کر دیا۔
قطری نشریاتی ادارے الجزیرہ کی رپورٹ کے مطابق وال اسٹریٹ جرنل اسرائیل کے دوحہ میں فلسطینی مزاحمتی تنظیم حماس کی سیاسی قیادت کو نشانہ بنانے کے حوالے سے اہم تفصیلات سامنے لے آیا۔
اخبار نے امریکی اور اسرائیلی حکام کا حوالہ دیتے ہوئے دعویٰ کیا کہ دوحہ حملے میں 10 سے زائد اسرائیلی لڑاکا طیاروں نے حصہ لیا جبکہ حماس کی سیاسی قیادت کے زیر استعمال گھر پر طویل فاصلے تک مار کرنے والے میزائل داغے گئے تھے۔
ڈبلیو ایس جے نے مزید بتایا کہ اسرائیل نے قطر پر میزائل داغنے سے چند منٹ قبل امریکا کو آگاہ کیا تھا تاہم حملے کے مقام کے بارے میں نہیں بتایا تھا۔
اخبار کی رپورٹ کے مطابق امریکی فوجی حکام نے میزائل لانچ ہونے کو دیکھ کر ہدف کا اندازہ لگایا، اسرائیلی حکام نے حملے کا انتخاب اس لیے کیا کیونکہ اسرائیل نے اندازہ لگایا کہ حماس کے کئی رہنما امریکی صدر ڈونلڈ ٹرمپ کی جنگ بندی کی تازہ تجویز پر غور کرنے کیلیے جمع ہیں۔
وال اسٹریٹ جرنل نے بتایا کہ اسرائیلی حکام حملے کیلیے امریکا کے ساتھ تعلقات کشیدہ ہونے کا خطرہ مول لینے کیلیے تیار تھے۔