صدرمملکت آصف علی زرداری نے بارشوں اور سیلاب سے تباہی پر گہرے افسوس اور متاثرین سے مکمل یکجہتی کا اظہار کیا ہے اور جاں بحق افراد کےاہل خانہ سے دلی تعزیت کی ، مسلح افواج اور ریسکیو اداروں کی بہادری اورخدمات کو خراج تحسین پیش کرتے ہوئے کہا آزمائش کی گھڑی میں افواجِ پاکستان نے عوام کی خدمت کی شاندار مثال قائم کی ہے۔
پنجاب،خیبرپختونخوا،گلگت بلتستان اورآزادکشمیرمیں سیلاب اور بارشوں سے تباہی پر اپنے بیان میں صدر آصف علی زرداری نے کہا کہ سیلاب اورریلوں میں جانی و مالی نقصان اٹھانے والے خاندانوں کے ساتھ ہیں ، کسانوں کی فصلوں اور مویشیوں کےبڑے پیمانے پر نقصان پر دلی ہمدردی ہے،صدر مملکت نے کہا انہیں پورا یقین ہے کہ قوم مشکلات کا مقابلہ حوصلے اور عزم کے ساتھ کرے گی، دوہزار دس اور دوہزار بائیس کے سیلابوں کی طرح اس بار بھی قوم سرخرو ہو گی ۔
