سوشل میڈیا پر اپنے منفرد اور فیملی کانٹینٹ سے شہرت پانے والے کانٹینٹ کرئیٹر طلحہ احمد کا انسٹاگرام اکاؤنٹ پلیٹ فارم نے مستقل طور پر معطل کردیا ۔
انسٹاگرام انتظامیہ کے مطابق، اکاؤنٹ کی معطلی کی وجہ طلحہ کی عمر 13 سال سے کم ہونا بتائی گئی ہے، تاہم طلحہ کے اہلِ خانہ کے مطابق ان کی عمر اس وقت 16 سال ہے۔
رہنما نیوز کی اطلاعات کے مطابق طلحہ کے بھائی، طٰہ احمد، نے بتایا کہ اکاؤنٹ معطلی کے بعد انسٹاگرام کو اپیل بھیجی گئی۔ انسٹاگرام کی جانب سے عمر کی تصدیق کے لیے شناختی دستاویزات اور طلحہ کی تصویر جمع کروانے کا کہا گیا
طحٰہ نے وضاحت کی کہ چونکہ طلحہ کے پاس قومی شناختی کارڈ موجود نہیں ہے، اس لیے انہوں نے اسکول کے جاری کردہ دستاویزات جمع کروائے جن میں طلحہ کی تصویر، نام اور تاریخِ پیدائش واضح درج تھی۔ اس کے باوجود، انسٹاگرام نے تاحال اکاؤنٹ بحال نہیں کیا۔
جب طلحہ کے بھائی سے یہ پوچھا گیا کہ آیا اکاؤنٹ کی معطلی کے پیچھے کسی رپورٹ یا شکایت کا عمل دخل ہو سکتا ہے تو ان کا کہنا تھا کہ ابھی تک کچھ واضح نہیں، لیکن ارادہ ہے کہ طلحہ جلد ایک نیا انسٹاگرام اکاؤنٹ بنا کر دوبارہ کانٹینٹ کریئیٹر کے طور پر واپسی کریں گے۔
دوسری جانب، طلحہ احمد کے فیس بک اکاؤنٹ پر ان کے فالورز کی جانب سے اکاؤنٹ معطلی پر تشویش اور حمایت بھرے تبصرے دیکھنے میں آ رہے ہیں۔
