گورنر پنجاب سردار سلیم حیدر لاہور میں سیلاب سے متاثرہ سوسائٹی تھیم پارک پہنچ گئے، گورنر نے سیلاب سے متاثرہ 9 لڑکیوں کی شادی کی ذمہ داری اٹھالی۔
تفصیلات کے مطابق گورنر پنجاب سردار سلیم حیدر سیلابی ریلے میں 9 بچیوں کے جہیز بہہ جانے والی فیملی کے پاس تھیم پارک ہاؤسنگ سوسائٹی موہلنوال پہنچے، انہوں نے متاثرین کو بھرپور تعاون کا یقین دلایا، سیلاب سے متاثرہ افراد نے گورنر پنجاب کو پانی میں ڈوبے اپنے گھر دکھائے۔
اس موقع پر گورنر سلیم حیدر کا کہنا تھا کہ شدید بارشوں اور سیلاب نے پنجاب میں تباہی مچادی، روزانہ کی بنیاد پر سیلاب سے متاثرہ خاندانوں کو تین وقت کا کھانا مہیا کیا جائے گا۔
گورنر پنجاب نے مزید کہا کہ اس دکھ کی اس گھڑی میں ہر ممکن مدد فراہم کی جائے گی، تھیم پارک ہاؤسنگ سوسائٹی موہلنوال میں خیمے لگا کر دیں گے۔
واضح رہے کہ پنجاب میں سیلاب سے 24 لاکھ سے زائد لوگ متاثر ہوچکے ہیں، جب کہ تقریباً 10 لاکھ افراد کو محفوظ مقامات پر منتقل کیا جاچکا ہے، سندھ سے اگلے 48 سے 72 گھنٹے بعد 13 لاکھ کیوسک کا ریلا گزرنے کا امکان ہے۔
سیلاب جنوبی پنجاب میں داخل ہوگیا، ملتان میں دریائے چناب کا بڑا آبی ریلا ہیڈ محمد والا سے گزر رہا ہے، پانی متعدد بستیوں میں داخل ہونے کے بعد ریسکیو ٹیموں کی جانب سے متاثرہ بستیوں سے لوگوں کو محفوط مقامات پر منتقل کیا جارہا ہے۔
ملتان میں دریائے چناب میں پانی کی سطح بلند ہوگئی، اکبر فلڈ بند کے قریب پولیس نے بیریئر لگاکر ہیڈ محمد والا روڈ کو ٹریفک کے لیے بند کر دیا ہے، ہیڈ محمد والا پر 4 لاکھ 90 ہزار کیوسک کا ریلا پہنچ گیا، آج ملتان میں 8 لاکھ کیوسک کا سیلابی ریلا گزرے گا، پانی زیادہ ہونے کی صورت میں بند پر شگاف ڈالا جائے گا، جس کے لیے تمام تیاریاں مکمل ہیں۔
گورنر پنجاب نے سیلاب سے متاثرہ 9 لڑکیوں کی شادی کی ذمہ داری اٹھالی
