صدر مملکت آصف علی زرداری نے (ن) لیگ کو آزاد کشمیر میں بننے والی حکومت میں باضابطہ شمولیت کی دعوت دے دی۔
تفصیلات کے مطابق وزیراعظم شہبازشریف کی اسلام آباد میں صدر مملکت آصف علی زرداری سے ملاقات ہوئی جس میں آزاد کشمیر میں وزیراعظم کی تبدیلی اور نئی حکومت سے متعلق تفصیلی بات چیت کی گئی۔
ملاقات میں بلاول بھٹو، نویدقمر، راجا پرویز اشرف، شیری رحمان، محسن نقوی، راناثنااللہ بھی موجود تھے۔
ایوان صدر میں ہونے والی ملاقات میں صدر نے (ن) لیگ کو آزاد کشمیر میں بننے والی حکومت میں باضابطہ شمولیت کی دعوت تاہم مسلم لیگ ن کی طرف سے کوئی باضابطہ جواب نہیں دیا گیا۔
ذرائع کا کہنا ہے کہ ملاقات میں مشاورت کا سلسلہ جاری رکھنے پر اتفاق کیا گیا ہے۔
پیپلزپارٹی نے وزیراعظم آزادکشمیر کیلئے امیدوار کا انتخاب کر لیا۔ ذرائع کے مطابق چوہدری یاسین وزیراعظم آزادکشمیر کیلئے پیپلزپارٹی کے امیدوار ہوں گے۔
پیپلز پارٹی سے منسلک ذرائع نے بتایا تھا کہ ان کی جانب سے حکومت سازی کے سلسلے میں وزیر اعظم آزاد کشمیر کو مستعفی ہونے کیلیے پیغام بھجوا دیا گیا۔
ذرائع نے بتایا کہ پیپلز پارٹی صدر آزاد کشمیر بیرسٹر سلطان محمود کو عہدے سے نہیں ہٹائی گئی، وہ عہدے پر برقرار اور اپنی آئینی مدت پوری کریں گے۔
ذرائع کے مطابق صدر آزاد کشمیر کے گروپ نے پیپلز پارٹی میں باضابطہ شمولیت اختیار کر لی ہے، قانون ساز اسمبلی میں گروپ کے 5 اراکین ہیں تاہم بیرسٹر سلطان محمود نے تاحال سیاسی جماعت میں شمولیت نہیں کی۔
