امریکی صدر ڈونلڈ ٹرمپ نے ایک بار پھر پاکستان کی سیاسی اور عسکری قیادت کی تعریف کرتے ہوئے کہا ہے کہ فیلڈ مارشل عاصم منیر اور پاکستان کے وزیراعظم عظیم رہنما ہیں جنہوں نے ایران کے ساتھ معاملات میں اہم کردار ادا کیا۔
ایک امریکی ویب سائٹ کو دیے گئے انٹرویو میں صدر ٹرمپ نے کہا کہ فیلڈ مارشل عاصم منیر ایک عظیم شخصیت ہیں جبکہ پاکستان کے وزیراعظم بھی ایک بہترین رہنما ہیں۔ انہوں نے کہا کہ فیلڈ مارشل عاصم منیر اپنے وزیراعظم کا مکمل احترام کرتے ہیں، جو ایک مثبت اور قابلِ ستائش بات ہے۔
صدر ٹرمپ کے مطابق پاکستانی قیادت نے ایران کے ساتھ ڈیل کے حوالے سے اہم معاونت فراہم کی، کیونکہ وہ ایرانی قیادت اور ایرانی عوام کو اچھی طرح جانتی ہے۔
بعد ازاں ایک تقریب سے خطاب کرتے ہوئے امریکی صدر نے کہا کہ چینی صدر ستمبر میں امریکا کا دورہ کریں گے اور ایران کے معاملے میں چین نے بھی اہم کردار ادا کیا ہے۔
انہوں نے کہا کہ چین اپنی تیل کی ضروریات کا تقریباً 50 فیصد ایران سے حاصل کرتا ہے، جبکہ امریکا کے اسرائیل کے ساتھ انتہائی مضبوط اور بہترین تعلقات ہیں۔
ڈونلڈ ٹرمپ نے مزید کہا کہ وہ رواں سال کسی وقت دوبارہ چین کا دورہ بھی کریں گے۔
