دنیا بھر میں مصنوعی ذہانت یا اے آئی پر تحقیق کرنے والے ممتاز سائنسدان جیفری ہنٹن، جنہیں ’گاڈ فادر آف اے آئی‘ کہا جاتا ہے، نے ایک نئی وارننگ جاری کی ہے جو عالمی سطح پر تشویش پیدا کر رہی ہے۔ انہوں نے خبردار کیا ہے کہ اے آئی کے مختلف خطرات جیسے کہ اس کا غلط استعمال، گمراہ کن معلومات کی تیاری، اور اس کا ’سپر اسمارٹ‘ بن جانا، ان سب کو دنیا ابھی تک سنجیدگی سے نہیں لے رہی۔ اے آئی ابتدائی درجے کی ملازمتوں کے لیے ایک سنجیدہ خطرہ ہے اگر اس ٹیکنالوجی کی ترقی پر نظر نہ رکھی گئی، تو یہ چند امیر افراد کو بے حد فائدہ پہنچائے گی، جبکہ بڑی تعداد میں لوگ بے روزگار ہو سکتے ہیں، جس سے معاشرتی عدم توازن جنم لے گا۔ انہوں نے اے آئی کے ایسے استعمالات پر بھی تشویش کا اظہار کیا جن کے ذریعے جعلی تصاویر، ویڈیوز، اور آڈیو تیار کی جا سکتی ہیں۔ ہنٹن کے مطابق یہ چیزیں سچائی اور جھوٹ کے درمیان کی لکیر کو مٹا سکتی ہیں، جو معاشرتی اور سیاسی لحاظ سے ایک سنگین خطرہ ہے۔
