وانا (15 نومبر 2025): وفاقی وزیر داخلہ محسن نقوی کا کہنا ہے کہ فیلڈ مارشل آرمی چیف جنرل عاصم منیر نے افغانستان کو کئی بار پیغام بھجوایا کہ دہشتگردی پر کوئی سمجھوتا نہیں۔
محسن نقوی نے کیڈٹ کالج وانا کا دورہ کیا جہاں آئی جی فرنٹیئر کور خیبر پختونخوا ساؤتھ میجر جنرل مہر عمر خان نے ان کا خیر مقدم کیا۔ وزیر داخلہ نے خارجی دہشتگردوں کا حملہ ناکام بنانے، کیڈٹس اور ٹیچرز کو ریسکیو کرنے والے افسروں و جوانوں سے ملاقات کی اور ان کی جرات اور پیشہ ورانہ مہارت کو سراہا۔
دورے کے دوران محسن نقوی کو خارجی دہشتگردوں کا حملہ ناکام بنانے اور تمام طلبا و ٹیچرز کو ریسکیو کرنے سے متعلق بریفنگ دی گئی۔
محسن نقوی نے کہا کہ یہ اصل میں دہشتگرد نہیں درندے ہیں جن کا انسانیت سے تعلق نہیں، کوئی بھی مذہب بچوں کو نشانہ بنانے کی اجازت نہیں دیتا، ان درندوں کا کوئی مذہب نہیں ان کو انسان کہنا انسانیت کی توہین ہے۔
انہوں نے کہا کہ پاک فوج اور ایف سی نے طلبا و ٹیچرز کو بحفاظت ریسکیو کر کے بہادری اور پروفیشنل ازم کی اعلیٰ مثال قائم کی، کیڈٹ کالج وانا کی بہترین انداز میں تزئین و آرائش کی جائے گی، دشمن سانحہ اے پی ایس جیسی کارروائی کرنا چاہتا تھا لیکن ہمارے دلیر جوانوں نے ان کو جہنم واصل کر کے سازش ناکام بنائی۔
وزیر داخلہ نے مزید کہا کہ ہم نے افغانستان سے بار بار بات کی کہ دہشتگردی نہیں کرنی، کابل سے کہا کہ ہمارے ملک کا امن تباہ نہ کریں، کیڈٹ کالج وانا پر حملہ کرنے والے دہشتگرد افغانستان سے آئے تھے۔
