یوکرین : ریلوے اسٹیشن پرایک شخص نے خود کو دھماکے سے اڑا لیا

یوکرین کے شمالی شہر اووروچ کے ریلوے اسٹیشن پر ایک شخص نے خود کو دھماکے سے اڑا لیا، جس کے نتیجے میں 4 افراد ہلاک اور 12 زخمی ہوگئے۔
غیر ملکی ذرائع ابلاغ کے مطابق یوکرین کی بارڈر گارڈ سروس کا کہنا ہے کہ حملہ آور نے تلاشی کے دوران دستی بم یا بارودی مواد سے دھماکا کردیا، جو اس کے جسم پر بندھا ہوا تھا۔
رپورٹس کے مطابق دھماکے میں حملہ آور خود بھی شدید زخمی ہوگیا اور اسپتال لے جاتے ہوئے ایمبولینس میں چل بسا، 23 سالہ حملہ آور خارکیف کا رہائشی تھا۔
حال ہی میں حملہ آور کو بیلاروس کی سرحد عبور کرنے کی کوشش کے دوران گرفتار بھی کیا گیا تھا، حملہ آور فوج میں لازمی بھرتی کی شرط سے بچنے کے لیے فرار ہونا چاہتا تھا۔
رپورٹس کے مطابق حملے میں 3 دیگر خواتین ہلاک اور 12 افراد زخمی ہوگئے۔ زخمیوں میں سے 7 کو اسپتال کے انتہائی نگہداشت کے وارڈ میں رکھا گیا ہے۔
تحقیقات کے لیے انکوائری کمیٹی تشکیل دیدی گئی ہے، تاحال حملے کے محرکات سامنے نہیں آسکے ہیں۔
جنوبی لبنان میں اسرائیل کا ڈرون حملہ، 2 افراد شہید
یوکرینی حکام کے مطابق فی الحال دھماکے کا روس-یوکرین جنگ سے براہِ راست تعلق ثابت نہیں ہوا۔ حملہ آور کے محرکات اور ارادے کے بارے میں تفتیش شروع کردی گئی ہے۔
واضح رہے کہ یوکرین میں روسی حملے کے بعد سے مارشل لا نافذ ہے جو فروری 2022 سے اب تک ساڑھے تین سال سے جاری ہے۔