یوکرین نے روسی ڈرون روکنے کیلیے اہم اقدام اٹھانے پر غور شروع کر دیا

یوکرین کی افواج روسی ڈرون روکنے میں ناکام رہی ہے اور اب اس نے اہم اقدام اٹھانے پر غور شروع کر دیا ہے۔
خبر رساں ایجنسی روئٹرز کی رپورٹ کے مطابق یوکرین ممکنہ طور پر روسی ڈرون حملے روکنے کیلیے موبائل کمیونیکیشن سروس کو محدود کر سکتا ہے تاکہ نیٹ ورکس کو حملے کیلیے استعمال ہونے سے روکا جا سکے۔
یہ بات یوکرینی چیف آف جنرل اسٹاف اینڈری ہناتوو نے ایک چینل کے ذریعے اپنے پیغام میں کی۔
جنگ کے ساڑھے تین سال بعد روس نے حالیہ مہینوں میں یوکرین پر ڈرون حملوں میں اضافہ کیا ہے۔ ماسکو نے اپنی ٹیکنالوجی کو بہتر بنایا ہے اور اسٹریٹجک اہداف اور اہم انفراسٹرکچر کو زیادہ سے زیادہ نقصان پہنچانے کیلیے ڈرونز کی تعداد میں اضافہ کیا ہے۔
یوکرینی جنرل اینڈری ہناتوو نے پیغام میں کہا کہ یہ موبائل کمیونیکیشن سروس کا مکمل خاتمہ نہیں ہے بلکہ کچھ مخصوص علاقوں میں 4 جی اور 5 جی پر پابندی ہے تاکہ روس ڈرون کیلیے ان کا استعمال نہ کر سکے۔
مقامی میڈیا کی رپورٹس کے مطابق تیز رفتار موبائل انٹرنیٹ کو بند کرنا اس لیے معنیٰ رکھتا ہے کہ کیمروں سے لیس ڈرونز کا مقابلہ کیا جا سکے جو تصاویر منتقل کرتے ہیں اور آپریٹ کرنے کیلیے 4 جی کنکشن کا استعمال کرتے ہیں۔
روس نے جنگ کے دوران یوکرینی ڈرون حملوں کو ناکام بنانے کیلیے بارہا موبائل انٹرنیٹ بند یا محدود کرنے کے احکامات جاری کیے ہیں۔