ٹرمپ کا اعلان: جنوبی کوریا میں کم جونگ کی اُن سے ملاقات کی خواہش

امریکا کے صدر ڈونلڈ ٹرمپ کا کہنا ہے کہ وہ جنوبی کوریا کے دورے کے دوران شمالی کوریا کے رہنما کم جونگ اُن سے ملاقات کی خواہش رکھتے ہیں۔
بین الاقوامی خبر رساں ادارے کی رپورٹ کے مطابق امریکی صدر ڈونلڈ ٹرمپ دورہ ملائیشیا پر روانہ ہو گئے، اس موقع پر انہوں نے اس خواہش کا اظہار کیا کہ وہ جنوبی کوریا کے دورے کے دوران شمالی کوریا کے رہنما کم جونگ اُن سے ملاقات کے خواہشمند ہیں۔
رپورٹس کے مطابق امریکی صدر کا کہنا تھا کہ میں کم سے اچھی طرح واقف ہوں اور ہم ایک دوسرے کے ساتھ اچھے تعلقات رکھتے ہیں۔
اہم امریکی عہدیدار کے مطابق صدر ٹرمپ کے دورے جنوبی کوریا کے دوران شمالی کوریا کے رہنما سے ملاقات شیڈول کا حصہ نہیں ہے مگر امکان ہے کہ دونوں رہنماؤں کی ملاقات ہوجائے۔
ٹرمپ ملائیشیا میں آسیان رہنماؤں کے 47 ویں اجلاس میں شرکت کریں گے، وہ اجلاس کے بعد جاپان اور جنوبی کوریا میں ایپک اجلاس میں بھی شرکت کریں گے۔
دوسری جانب ٹرمپ نے کہا ہے کہ فلسطینی اس وقت لیڈر کے بغیر ہیں، محمود عباس بزرگ ضرور ہیں لیڈر نہیں۔
امریکہ کے صدر ٹرمپ نے کہا کہ محمود عباس فلسطینیوں میں ایک بزرگ کی حیثیت رکھتے ہیں مگر فلسطینیوں کے پاس آج کل کوئی لیڈر نہیں ہے، جو بعد از غزہ جنگ کے منظر نامے میں فلسطینیوں کی قیادت کر سکتا ہو۔
صدر ٹرمپ نے اس تناظر میں فلسطینی اتھارٹی کے صدر محمود عباس کا ذکر کرتے ہوئے کہا میں محمود عباس سے کافی عرصے سے مل رہا ہوں وہ ایک معقول آدمی ہیں مگر وہ ایسے ممکنہ لیڈر نہیں جس کی فلسطینیوں کو ضرورت ہے۔