ضلع خیبر میں پاکستان اور افغانستان کے درمیان حالیہ کشیدگی کے باعث طورخم سرحدی گزرگاہ سے افغان پناہ گزینوں کی وطن واپسی کا عمل عارضی طور پر معطل کر دیا گیا ہے۔
ضلعی انتظامیہ کے مطابق سرحدی صورتحال کشیدہ ہونے کے بعد نقل و حرکت روک دی گئی، جبکہ افغان فورسز کی فائرنگ کے پیش نظر ٹرمینل میں موجود افغان پناہ گزینوں کی درجنوں گاڑیوں کو حفاظتی اقدام کے طور پر لنڈی کوتل منتقل کیا گیا۔
حکام کا کہنا ہے کہ حالات معمول پر آنے تک واپسی کا عمل بند رہے گا، جبکہ طورخم بارڈر کے ذریعے روزانہ سینکڑوں افغان خاندان اپنے ملک واپس جاتے تھے۔
دوسری جانب پاکستان کے مطابق گزشتہ ڈھائی برس میں 20 لاکھ سے زائد افغان شہری رضاکارانہ طور پر وطن واپس جا چکے ہیں، جبکہ سکیورٹی ذرائع کے مطابق سرحدی جھڑپوں کے دوران پاکستانی فورسز نے افغان طالبان کی فائرنگ کا بھرپور جواب دیا اور متعدد چیک پوسٹوں کو تباہ کیا۔
