تفصیلات کے مطابق میئر کراچی مرتضیٰ وہاب نے بتایا ہے کہ شہریوں کو حب ڈیم سے پانی کی فراہمی آج صبح 7 بجے سے شروع کر دی گئی ہے، کینال میں پانی چھوڑ دیا گیا ہے۔
حب کینال بدھ کو ہونے والی بارش اور برساتی ریلے سے متاثر ہو گئی تھی، حب کینال کے اطراف کی مٹی پانی میں بہنے کے باعث کینال ٹوٹ پھوٹ کا شکار ہو گئی تھی، جس کے بعد کینال میں پانی روک دیا گیا تھا۔
یاد رہے کہ جمعرات کو محکمہ ایری گیشن نے کہا تھا کہ حالیہ دنوں میں ہونے والی شدید بارشوں کے بعد کراچی کو پانی سپلائی کرنے والا حب ڈیم بھر گیا ہے، محکمہ ایری گیشن نے الرٹ جاری کرتے ہوئے کہا کہ حب ڈیم میں پانی کی سطح 338 فٹ تک پہنچ گئی ہے، اور پانی ذخیرہ کرنے کی گنجائش صرف ایک فٹ رہ گئی ہے۔
رہنما نیوز کے مطابق منگھوپیر پولیس اور واٹر بورڈ کی مبینہ سرپرستی میں حب ڈیم سے ٹینکر مافیا پانی چوری کر رہا ہے، جو شہریوں کو مہنگے داموں فروخت کیا جا رہا ہے۔ ٹینکر مافیا حب ڈیم سے روزانہ سیکڑوں ٹینکر پانی چوری کرنے میں مصروف ہے۔
ادھر موسم کے حوالے سے محکمہ موسمیات کا کہنا ہے کہ آئندہ چند روز تک کراچی کا موسم گرم و مرطوب رہے گا جب کہ کراچی میں مون سون کا سلسلہ 30 ستمبر تک رہے گا، اور اگلا اسپیل آئندہ 5 روز میں شہر میں بادل برسا سکتا ہے
