واشنگٹن (18 دسمبر 2025) — امریکی صدر ڈونلڈ ٹرمپ کی انتظامیہ نے افغانستان کی بگڑتی سیکیورٹی صورتحال کے پیش نظر افغان شہریوں کے لیے امیگریشن پالیسی مزید سخت کر دی ہے۔
ٹرمپ انتظامیہ نے افغان اسپیشل امیگرنٹ ویزا معطل کرتے ہوئے افغان شہریوں کے لیے تمام امیگریشن چینلز بند کر دیے ہیں۔ امریکی صدر نے نیا صدارتی حکم جاری کیا ہے، جس کے تحت افغان نژاد شہریوں کے لیے امیگریشن پابندیاں سخت کر دی گئی ہیں۔
واشنگٹن پوسٹ کے مطابق افغانستان ان 12 ممالک میں شامل ہے جن پر مکمل سفری پابندیاں عائد ہیں، جس میں مترجمین بھی شامل ہیں۔ اخبار نے واضح کیا کہ افغان طالبان رجیم کی ریاستی سرپرستی میں دہشت گردی عالمی امن کے لیے خطرہ بن چکی ہے۔
اسی دوران جرمنی نے پناہ گزین پروگرام معطل کر دیا ہے، آسٹریلیا نے افغان شہریوں پر سخت پابندیاں عائد کرتے ہوئے افغان سفارت خانہ بند کرنے کا عندیہ دیا ہے، جبکہ برطانیہ نے شہریوں کے لیے سخت ٹریول ایڈوائزری جاری کر دی ہے۔
ماہرین کے مطابق یہ اقدام امریکی حکومت کی جانب سے طالبان کے اقدامات کے خلاف سخت ردعمل اور عالمی سلامتی کے تحفظ کے لیے اٹھایا گیا ہے۔
