صدر ڈونلڈ ٹرمپ کا سیاسی انتہا پسندی کے خلاف کریک ڈاؤن کا اعلان

واشنگٹن (11 ستمبر 2025): چارلی کرک کے قتل پر امریکی صدر ڈونلڈ ٹرمپ نے سیاسی انتہا پسندی کے خلاف کریک ڈاؤن کا اعلان کیا ہے۔
تفصیلات کے مطابق امریکی صدر ڈونلڈ ٹرمپ نے اوول ہاؤس میں میڈیا سے گفتگو کرتے ہوئے کہا کہ چارلی کرک جیسے عظیم امریکیوں کو نازیوں سے تشبیہ دی گئی، یہ بیانیہ امریکا میں دہشتگردی کا باعث بن رہا ہے، یہ اب بند ہونا چاہیے۔
صدر ٹرمپ نے کہا کہ چارلی کرک کے قتل کے بعد سیاسی انتہا پسندی کے خلاف کریک ڈاؤن کریں گے، اپنے قریبی ساتھی چارلی کرک کے قاتلانہ حملے میں ہلاک ہونے پر امریکی صدر کا کہنا تھا کہ وہ بہت غمزدہ ہیں اور غصے میں ہیں۔ انھوں نے کہا چارلی کرک نہ صرف ایک عظیم انسان تھے بلکہ میرے اور لاکھوں امریکیوں کے دلوں کی دھڑکن تھے، میں اُن کے اہلخانہ سے دلی تعزیت کرتا ہوں۔
صدر ٹرمپ کے قریبی ساتھی چارلی کرک قاتلانہ حملے میں چل بسے
امریکی صدر نے چارلی کے قتل پر ملک بھر میں 3 روزہ سوگ کا اعلان کیا ہے اور اتوار تک امریکی پرچم سرنگوں رہے گا۔ یاد رہے کہ صدر ٹرمپ نے گزشتہ سال صدارتی انتخابی مہم میں ساتھ دینے پر چارلی کرک کو سراہا تھا۔
واضح رہے کہ امریکی صدر ٹرمپ کے حامی قدامت پسند تجزیہ کار چارلی کرک کو ہزارو ں طلبہ کے اجتماع میں قتل کیا گیا، انھیں یوٹا ویلی یونیورسٹی میں خطاب کے دوران گردن پر گولی ماری گئی، ایف بی آئی ڈائریکٹر کا کہنا تھا کہ فائرنگ ممکنہ طور پر یونیورسٹی کیمپس کی چھت سے کی گئی، قتل کے شبہے میں ایک معمر شخص کو حراست میں لیا گیا تاہم پوچھ گچھ کے بعد رہا کیا گیا۔ گورنر اسپنسرکوکس نے اپنے بیان میں کہا کہ یہ ایک سیاسی قتل ہے۔