راولپنڈی: شہر میں ڈینگی کا مرض مکمل طور پر آؤٹ آف کنٹرول ہو چکا ہے۔ سرکاری اسپتالوں میں ڈینگی کے مریضوں کی تعداد 413 تک پہنچ گئی ہے، جبکہ پرائیویٹ اسپتالوں اور کلینکوں میں ڈینگی کے مریضوں کی تعداد 400 سے تجاوز کر گئی ہے۔
طبی ماہرین نے آئندہ ڈیڑھ ماہ کو ڈینگی کے پھیلاؤ کے لیے انتہائی خطرناک قرار دیا ہے۔ انتظامیہ کی رپورٹ کے مطابق مجموعی طور پر 4,982,897 گھروں کی جانچ کی گئی ہے، جن میں سے 130,336 گھروں سے ڈینگی لاروا برآمد ہوا ہے۔
ہاٹ اسپاٹ علاقوں سے 17,862 لاروا ملنے کے بعد متعلقہ حکام نے فوری طور پر کارروائیاں شروع کر دی ہیں۔ کلئیرڈ ایریاز میں تھرڈ پارٹی سروے کے دوران 113 مختلف مقامات سے بھی بھاری تعداد میں ڈینگی لاروا برآمد ہوا ہے۔
دوسری جانب بغیر اطلاع غیر حاضر رہنے والے 13 ڈینگی ورکرز اور جھوٹی رپورٹس دینے والے 3 ورکرز کو معطل کر دیا گیا ہے۔
ڈینگی آپریشن کے دوران لاروا برآمدگی پر اب تک 3,894 مقدمات درج کیے گئے ہیں، جن میں سے 1,722 پراپرٹیز کو سیل کیا گیا ہے۔ علاوہ ازیں، ڈینگی لاروا ملنے پر 3,304 چالان بھی کیے گئے اور مجموعی جرمانہ 9,784,000 روپے سے زائد کیا گیا ہے۔
حکومت اور انتظامیہ شہریوں کو صفائی ستھرائی اور حفاظتی تدابیر اختیار کرنے کی ہدایت کر رہی ہے تاکہ ڈینگی کے پھیلاؤ کو روکا جا سکے۔
